Lənkəranda həndbol üzrə Azərbaycan birinciliyinin zona yarışı təşkil olunub. Bu haqda bu gün, 24 mart tarixində Cenublu.az Azərbaycan Həndbol Federasiyasına istinadən xəbər verir.
Olimpiya İdman Kompleksində keçirilən yarışa yerli həndbolçularla yanaşı, Cəlilabad, Biləsuvar və Yardımlı rayonlarının 2008 və ondan kiçik təvəllüdlü oğlanlardan ibarət komandaları qatılıb. Açılış mərasimində iştirakçıları salamlayan AHF-nin idman şöbəsinin müdiri, Avropa Həndbol Federasiyasının nümayəndəsi İsgəndər Əsgərov onları Novruz bayramı münasibətilə təbrik edib. Bu cür yarışların bölgələrdə həndbolun inkişafına təkan verəcəyini deyən təcrübəli mütəxəssis komandalara uğurlar arzulayıb. AHF tərəfindən idman geyimləri və toplar hədiyyə olunduqdan sonra yarışa start verilib.
Gərgin və maraqlı mübarizənin nəticələrinə əsasən, Cəlilabad həndbolçuları yarışın qalibi adına layiq görülüblər. Biləsuvar komandası ikinci, Lənkəran kollektivi üçüncü yeri tutub.
Reqlamentə əsasən, Cəlilabad komandası iyun ayında Bakıda keçiriləcək Azərbaycan birinciliyinin final mərhələsinə vəsiqə qazanıb.
