Sənan İlham oğlu Axundzadə 1996-cı ildə Bakıda ziyalı ailəsində anadan olub. Əslən Lənkəran rayonunun Boladı kəndindəndir.
3 yaşında olarkən atasının işi ilə bağlı olaraq ailəsi ilə birlikdə əvvəlcə ABŞ, Türkiyə, Birləşmiş Ərəb Əmirlikləri, daha sonra isə Kanadaya köçür. Orta məktəbi yüksək nəticələrlə bitirdikdən sonra, 2014-cü ildə dünya şöhrətli Vaterloo Universitetinin Mexanika mühəndisliyi fakültəsinə daxil olur. Tələbə olduğu zaman müxtəlif yüksək reytinqli Kanada şirkətlərində təcrübə keçməyə nail olub.
Universitetdə oxuduğu müddətdə göstərdiyi yüksək bacarıq, bilik və nailiyyətlərə görə 2018-ci ildə universitetin təklif etdiyi proqram çərçivəsində ABŞ-nin Kaliforniya ştatında tanınmış “mühəndis beyinlər”in və böyük texnoloji şirkətlərin cəmləşdiyi “Silikon vadisi”ndə yerləşən Tesla şirkətinin baş ofisində işləmək üçün dəvət alır.
Atası İlham Axundov Vaterloo Universitetinin yeganə azərbaycanlı professoru, Riyaziyyat və Biznes proqramları direktorudur. 2016-cı ildə elmi, pedaqoji və diaspor fəaliyyətinə görə İlham Əliyev tərəfindən “Tərəqqi” medalı ilə təltif olunub.
