Hacı Mirağa hamamı Masallı rayonunun Boradigah qəsəbəsinin mərkəzində, avtomobil dayanacağında yerləşir. Hamam XIX-XX əsrlərə aid edilir. Bu hamam Masallının Bədəlan kəndindən olan tacir Hacı Mirağa tərəfindən inşa edilib.
Hacı Mirağa hamamının qadınlar və kişilər üçün nəzərdə tutulan iki giriş qapısı var idi. Hamam çimmə zalından, soyunub-geyinmə otağından və hovuz olan otaqdan ibarət olub. Hamam həftənin beş günü kişilər, çərşənbə və cümə günləri isə qadınlar tərəfindən istifadə olunurdu [1].
Hamam xüsusi istilik sistemi ilə təhciz olunmuşdu. İstilik sisteminin girişi hamamın arxa hissəsində yerləşirdi. Bu hamamı isitmək üçün kürəkxana (istilik sistemi) adlanan yerdə odun qalayırdılar və onun tüstüsü hamamı isidirdi [2].
Hacı Mirağa bu hamamdan əlavə, Boradigah qəsəbəsinin mərkəzində ikimərtəbəli eyvanlı şüşəbənd ev və karvansaray da tikmişdi.
2001-ci ildən hamam yerli əhəmiyyətli memarlıq abidəsi kimi qorunur. Hazırda hamam yararsız vəziyyətdədir [1].
Ədəbiyyat:
Foto Cenublu.az[/caption]
