Zülfi Qasım oğlu Xudaverdiyev 1913-cü ildə Masallı rayonunun Boradigah qəsəbəsində anadan olub [1].
O, 1941-ci ildə hərbi xidmətə çağırılıb. Xudaverdiyev xidmətdə tibb kursunu keçərək, Zaqafqaziya Hərbi Dairəsinin 123-cü tibb batalyonuna göndərilib.
Zülfi Xudaverdiyev Böyük Vətən müharibəsi iştirakçısı olub. Müharibədə o, Qafqaz uğrunda döyüşlərdə iştirak edib [2]. Xudaverdiyev 36-cı dağ atıcı alayının 9-cu diviziyasının tərkibində Krasnodar və Ust-Labinskaya şəhərləri uğrunda gedən döyüşlərdə xüsusilə fərqlənib.
Döyüşçü İkinci Dünya müharibəsi zamanı Novorossiysk şəhərinin və Krım yarımadasının almanlardan azad edilməsində [1], o cümlədən Ukraynada gedən döyüşlərdə, həmçinin Yassı-Kişinyov əməliyyatında iştirak edib [2]. Zülfi Xudaverdiyev Polşanın Dembitsa şəhəri uğrunda olan döyüşlərdə fərqlənib. Onun olduğu diviziya almanlar tərəfindən “Stalinin başkəsənləri” adlandırılırdı.
Xudaverdiyev 1944-cü ilin oktyabr ayında Polşanın Jeşuv şəhəri yaxınlığında kontuziya alıb. Buna baxmayaraq, döyüşçü bir müddət sonra Praqa şəhərinin düşməndən azad olunmasında iştirak edib. Onun axırıncı döyüşü isə Çexiyanın Nimburk şəhərində baş tutub. Zülfi 1945-ci ilin oktyabr ayında ordudan tərxis olunub.
Böyük Vətən müharibəsi zamanı Zülfi Xudaverdiyev minlərlə əsgər və komandiri döyüş bölgəsindən çıxarıb, birinci tibbi yardım göstərərək, onların həyatlarını xilas edib.
Xudaverdiyev “Qırmızı ulduz” ordeni, “Döyüş xidmətlərinə görə”, “Qafqazın müdafiəsinə görə”, “Praqanın azad olunmasına görə” medallarına layiq görülüb [1].
Ədəbiyyat:
