Rus-erməni işğalçıları tərəfindən yandırılan ibadətgah: İkinci Yeddioymaq kənd məscidi

İkinci Yeddioymaq kənd məscidi Masallı rayonunun Yeddioymaq kəndində yerləşir [1].

Musarza Mirzəyevin “Mənim Masallım” kitabında ibadətgahın XIX əsrdə tikildiyi qeyd edilib [3]. Lakin yerli əhalinin sözlərinə görə, burada XIX əsrdən əvvəl də məscid mövcud olub [2].

İbadət evi 1918-ci ildə rus-erməni işğalçıları tərəfindən yandırılıb. Kənd sakini Molla Əbül Qasım bolşevik və daşnaklardan gizlənmək üçün bu məscidə üz tutub. Lakin o və Kərbəlayi Nəcəfəli Əliqulu oğlu adlı şəxs bolşevik və daşnaklar tərəfindən həmin zaman öldürülmüşlər. Hazırda onların məzarları məscidin həyətində yerləşir [4].

İbadətgah düzbucaqlı formadadır və qırmızı kərpicdən inşa edilib. Məscidin ön hissəsində taxtadan düzbucaqlı formada üç pəncərə və iki qapı var. İbadət evinin damı şiferlə örtülüb. İbadətgahın mehrabı, minbəri və günbəzi mövcuddur. Günbəz güldəstə formasındadır və dördguşəlidir. Günbəzin üstündə ay və ulduz rəmzi qoyulub [1].

Yerli sakinlərin sözlərinə görə, 1930-cu illərdə məscid bərpa olunub. Buna baxmayaraq, sovet dövründə məscid klub və taxıl anbarı kimi istifadə edilib. 1990-cı illərdə məscid təmir edilib və yenidən rəsmi şəkildə ibadətgah kimi fəaliyyət göstərməyə başlayıb [1,2].

Ədəbiyyat:

1. İldırım Şükürzadə, Zahir Əmənov. Masallının tarix və mədəniyyət abidələri. Bakı-2021.


2. Tofiq İslamov. Yeddioymaq. Bakı-2010.


3. Musarza Mirzəyev. Mənim Masallım. Bakı-1991.

[URIS id=42590]