Qızılağac Milli Parkında Azərbaycanda ilk dəfə olaraq Flaminqo festivalı keçirilib. Bu haqda məlumatı Cenublu.az bu gün, 22 noyabr tarixində verir.
Festival çərçivəsində iştirakçılar üçün Qızılağac Milli Parkı ərazisində qayıq və kvadrosikllərlə gəzinti təşkil edilib, ziyarətçilər körfəz ərazisində quş koloniyalarını müşahidə ediblər, həmçinin konsert proqramı təşkil olunub, ziyarətçilər stendləri gəzərək ölkəmizdəki milli parklarla virtual tanışlıq imkanı qazanıblar.
Festival çərçivəsində 1 milyon balıq körpəsi Qızılağac Milli Parkının körfəz ərazisinə, milli parkın faunasına xas olan turac quşları isə təbiətə buraxılıb.
Tədbirdə Azərbaycanın qorunan ərazilər şəbəkəsini, iqlim dəyişməsinin biomüxtəlifliyə təsiri və bioloji müxtəlifliyin hazırkı vəziyyətini əks etdirən stendlər, məlumat lövhələri, milli parkların təbiətinə, flora və faunasına aid tanışlıq guşələri, suvenirlər, həmçinin Qızılağac Milli Parkını tərənnüm edən simvollar nümayiş etdirilib.
Qeyd edək ki, tədbir Lənkəran Regional Turizm İdarəsi, Ekologiya və Təbii Sərvətlər Nazirliyi və Qızılağac Milli Parkının təşkilatçılığı ilə baş tutub.
[URIS id=48959]
