Ağəddin Mansur oğlu Mansurzadə 28 avqust 1940-cı ildə Masallı rayonunun Qodman kəndində kolxozçu ailəsində anadan olub.
O, ilk təhsilini 1948-1958-ci illərdə Bədəlan kənd orta məktəbində alıb. Mansurzadə 1958-ci ildən Sumqayıt şəhərindəki Sintetik Kauçuk zavodunda işləməyə başlayıb.
O, 1960-cı ildə hərbi xidmətə çağırılıb [1].
Ağəddin Mansurzadə 1963-1969-cu illərdə indiki Bakı Dövlət Universitetində filologiya fakültəsində təhsil alıb.
O, 1963-1966-cı illərdə Şumqayıt Şəhər Komsomol Komitəsi 1 saylı tikinti trestində, Şumqayıt Neft-Kimya Kombinatı Ümumittifaq Zərbəçi Komsomol Tikinti Qərargahında işləyib. Mansurzadə 1966-cı ildə Şumqayıt şəhər 35 saylı texniki-peşə məktəbində, 1967-1970-ci illərdə isə 7 saylı texniki peşə məktəbində çalışıb. O, 1970-ci ildən başlayaraq müxtəlif vaxtlarda “Ədəbiyyat və incəsənət”, “Bakı”, “Ülfət”, “168 saat”, “Dünya pəncərə”, “Bakı Bələdiyyəsi” qəzetlərində və “Mozalan” satirik jurnalında işləyib [2].
Ağəddin Mansurzadə ədəbi yaradıcılığa 1964-cü ildən “Ədəbiyyat və incəsənət” qəzetində çap etdirdiyi “İslam və onun briqadası” adlı ilk oçerki ilə başlayıb. Onun əsərləri sırasında “Mən hamının balasıyam”, “Dağ suyu”, “Cənnətdə görüşənədək”, “Mən Bəxtiyaram”, “Ayağa qalxaq”, “Ədəbi portretlər”, “Sənətkar xoşbəxtliyi” və s. qeyd etmək olar [1,3]. Onun 1000-dən artıq məqalə, oçerk və elmi-publisistik yazıları bir neçə dillərdə nəşr edilib [2].
Mansurzadə 1977-ci ildən Azərbaycan Jurnalistlər Birliyinin, 1985-ci ildən isə Azərbaycan Yazıçılar Birliyinin üzvü olub [1]. Bundan əlavə, o, Qafqaz Müsəlmanları İdarəsi Elmi-Dini Şurasının üzvü seçilib. Ağəddin “Qızıl qələm” və “Vətən” mükafatlarının laureatı idi [2].
Ağəddin Mansurzadə 27 aprel 2008-ci ildə vəfat edib [3]. 20 noyabr 2013-cü ildə yazıçıya həsr olunmuş ”Ömür bitsə də…” kitabının təqdimatı keçirilmişdir [4].
Ədəbiyyat:
