Polutəpə yaşayış yeri Cəlilabad rayonunun Üçtəpə kəndinin şərqində, İncəçayın sahilində, təpə üzərində yerləşir. Burada 2014 və 2016-cı illərdə arxeoloq Tufan Axundov tərəfindən arxeoloji qazıntılar aparılıb [2,3].
Yaşayış yerinin sahəsi 5 hektardan çoxdur. Ərazidə aparılan qazıntılar nəticəsində müəyyən edilib ki, burada, əsasən, eneolit dövründə və IX-XI əsrin əvvəllərində yaşayış olub [1,3].
Abidənin orta əsr təbəqəsində üç təsərrüfat quyusu qeydə alınıb, həmçinin saxsı qab qırıqları tapılıb. Ərazidə tapılan qabların arasında üstü anqob (dekorativ keramika örtüyü) naxışlı nümunələr çoxluq təşkil edib [3].
Polutəpə yaşayış yerində 2014-cü ildə arxeoloq Tufan Axundov tərəfindən tədqiqat işləri aparılıb. Həmin zaman arxeoloq dulus kürələri, kərpicdən və möhrədən tikililər, insan qəbirləri, həmçinin iki uşaq qəbri, müxtəlif bəzək və məişət əşyaları, saxsı küpün içərisində bitki qalıqları tapıb.
2016-cı ildə Tufan Axundov bu ərazidə arxeoloji qazıntıları davam etdirib. Qazıntılar zamanı Polutəpə yaşayış yerindən əmək, məişət və ov alətləri, qablar, qadın fiquru, ocaqlar və digər maddi-mədəniyyət nümunələri aşkar edilib [2]. Burada, həmçinin arxeoloqun dediyinə görə, Qafqazda aşkar olunan ən qədim ibadət evi tapılıb [2,4]. Qədim ibadətgahın mərkəzində böyük küp yerləşir. Küpün daxili isə kül ilə doldurulmuşdur [5]. İş yekunlaşdırıldıqdan sonra ərazidən tapılan eksponatlar AMEA-nın elmi laboratoriyasına aparılıb [2].
Ədəbiyyat:
