Sığdaş kənd məscidi Masallı rayonunun eyniadlı kəndinin mərkəzində yerləşir. İbadətgah 2002-ci ildə inşa edilib [3].
Məscid düzbucaqlı formadadır və qırmızı kərpicdən tikilib. İbadət evinin tavanı taxtadan hazırlanıb, damı isə dəmir təbəqə ilə örtülüb. Məscidin ön tərəfində tağlı dörd pəncərə və iki qapı var. Yan tərəfdə iki, arxa divarda isə beş pəncərə yerləşir. İbadətgahın ön hissəsində eyvan var. İbadət evinin iki minarəsi və bir günbəzi mövcuddur. Minarələrin hündürlüyü 22 metr təşkil edir [3].
Bu məscidin yerində əvvəllər köhnə ibadətgah olub. Həmin ibadət evi haqqında 1859-1864-cü ilə aid olan Bakı quberniyası üzrə aparılan siyahıyaalınmada qeyd edillib [1]. Köhnə məscid Mürtəza-Əli adını daşıyırdı. Sonralar Mürsəlli, yəni “Allah tərəfindən göndərilmiş müqəddəs” adlandırılıb. Məhz bu ərazidə ibadətgahın tikilməyi bir rəvayətlə bağlıdır. Deyilənlərə görə, gecələr məsciddən nöhə (matəm nəğmələri) səsi eşidilirmiş. Lakin səsə gələn yerli sakinlər heç kimi görmürdülər. Bu hadisə bir neçə dəfə təkrarlanır. Bundan sonra həmin yeri kənd əhalisi müqəddəs saymağa başlayır və XIX əsrdə burada məscid inşa edirlər [2].
Hazırda Məscidin önündə Mürsəlli ocağı yerləşir. Rəvayətə görə, İmam Əli buradan keçərkən quyu qazdırıb və sonralar bu yer ziyarətgaha çevrilib [3].
Ədəbiyyat:
