Şatıroba kəndi Masallı şəhərindən təxminən 20 km cənub-şərqdə yerləşir. Kənd XVIII əsrdə salınıb. Baqdasaroba və Erəxoba məhəllələrinin əhalisi kəndin ilk sakinləri hesab olunurlar [1].
Şatıroba toponiminin mənası müxtəlif şəkildə izah edilir. Şatıroba sözündə “Şatır” ərəb dilindən tərcümədə “çörəkçi”, “oba” isə Azərbaycan dilində “yurd, məskən” anlamında işlənir, yəni toponim “çörəkçi obası” mənasını verir [2].
Bu toponimin yaranmasını İranın Xalxal ərazisində yaşayan “şatrablı” kürd tayfasının, fars dilində “şotor”, ərəb dilində “şən, şux” mənalarında işlənən “şatir” sözləri ilə əlaqələndirmək olar. Ehtimal olunur ki, vaxtı ilə monqol-tatar sərkərdələrinə “şatir” deyilirdi. Şatıroba kəndinin monqol-tatar tayfalarının məskunlaşması ilə əlaqədar yaranmış Türkoba kəndi ilə bitişik ərazidə yerləşməsini nəzərə alaraq, belə bir fikrə gəlmək olar ki, Şatıroba monqol sərkərdəsi adı əsasında yaranıb [1].
Yerli əhalinin sözlərinə görə, Şatıroba sözü bu yaşayış yerinin talış dilindəki adı olan “Şatoba” sözündən yaranıb. “Şatoba” sözü talış dilindən tərcümədə “əyri oba” deməkdir. Bu ad kəndin coğrafi şəraitinə də uyğundur. Toponim, həmçinin Cəlilabad rayonunun ərazisində də mövcuddur [2].
Şatıroba kəndində bir neçə tarixi abidələr mövcuddur: tunc dövrünə aid Axundtəndi kurqanı, orta əsrlərə aid Mir Abdulla ocağı, Seyidoba qəbiristanlığı, Qara Seyid türbəsi və s. [3].
1915-ci ilə aid olan məlumata görə, Şatıroba kəndində 290 nəfər yaşayırdı [4]. 2009-cu ilin statistik göstəricilərinə əsasən, bu kənddə 1740 nəfər yaşayıb [5].
Ədəbiyyat:
