Şıxlar kəndi Masallı şəhərindən 15 km cənub-qərb istiqamətində yerləşir.
Deyilənlərə görə, əvvəllər bu kənddə Nəzər adlı şeyx yaşadığından yaşayış məntəqəsinin adı Nəzərkənd idi [6]. Başqa versiyaya görə, kəndin adı Şeyxlər olub. Buna səbəb isə burada şeyxlərə məxsus tikililərin mövcud olmasıdır [2]. “Şeyx” sözü ərəb dilindən “qoca, ağsaqqal” deməkdir. Bu ad orta əsrlərdə tayfa, qəbilə, təriqət başçılarına, görkəmli ilahiyyatçılara və digər nüfuzlu şəxslərə aid edilirdi.
Şıxlar adında ölkədə təxminən 43 toponim mövcuddur. Tarixçi Məşədixanım Nemətova Şıxlar toponiminə aid bir fikir bildirib: “Bütün müsəlman şərqində olduğu kimi, orta əsr Azərbaycanında da böyük alim və təriqət başçılarının məzarları ətrafnda onlardan sonra nəzəriyyələrini yayan müridləri dəfn olunurdu. Müridlər də şeyx ləqəbi daşıdıqları üçün bir neçə ildən sonra məzar və ətrafındakı qəbiristanlıqlar “Şeyxlər” (Şıxlar) adını alırdı. Bələ kənd adlarına tez-tez rast gəlmək olur” [1].
Şıxlar kəndində bir neçə tarixi abidə mövcuddur: e.ə. III-I əsrlərə aid Dirozə zəmin (uzun torpaq qəbirlər) nekropolu, son tunc - ilk dəmir dövrünə aid Aşağı-Homa kurqanları, IX-XIII əsrlərə aid Şıxlar yaşayış yeri, orta əsrlərə aid Pirzəba türbəsi, XIX əsrə aid Şıxlar kənd məscidi və Mir Əlican ocağı [5].
Əhali, əsasən, arıçılıq və əkinçiliklə məşğuldur [6]. 1915-ci ilə aid olan siyahıyaalınma məlumatına əsasən, Şıxlar kəndində 113 nəfərin yaşadığı qeyd olunub [4]. 2009-cu ilin statistik göstəricilərinə əsasən, bu kənddə 456 nəfər yaşayıb [3].
Ədəbiyyat:
