Əslən Masallıdan olan 13 yaşlı Sarıngül Zahidli "Белая трость" beynəlxalq tədbirində ölkəmizi təmsil edəcək. Bu haqda məlumatı Cenublu.az bu gün, 29 avqust tarixində verir.
O, 10 oktyabr Rusiyanın paytaxtı Moskva şəhərində keçiriləcək XIV "Белая трость" Beynəlxalq Xeyriyyə Festivalının finalçısı olub.
Sarıngül dünyanı adi insanlardan fərqli yaşayır: onun anadan olduqdan bəri gözləri görmür. O, dünyanı daha çox toxunma hissləri ilə dərk edir. Saringül musiqiyə 5 yaşından maraq göstərib. O, daim melodiyaları dinləyir və onları pianoda səsləndirməyə çalışırdı. Onun bacarığını görən valideynləri qızı Bakının Nərimanov rayonunda yerləşən Sağlamlıq imkanları məhdud uşaqlar üçün 5 nömrəli Respublika xüsusi internat məktəbinə göndəriblər. Hal-hazırda 8-ci sinifdə oxuyur.
Əsasən, Rəşid Behbudovun repertuarından Azərbaycan xalq mahnılarını və bəstələrini dinləməyi və ifa etməyi sevir. Sarıngül əvvəllər nə respublika, nə də beynəlxalq yarışlarda iştirak etməyib. Ona XIV Beynəlxalq "Белая трость" xeyriyyə festivalında iştirak etməyi sinif rəhbəri Kifayət İbadova tövsiyə edib.
O, bu layihə üçün Rəşid Behbudovun repertuarından məşhur "Azərbaycan" mahnısını ifa edib.
Musiqidən əlavə, Sarıngül ədəbiyyat və tarixlə maraqlanır. Gələcəkdə o, atasının alman dili müəllimi olmaq arzusunu həyata keçirmək istəyir.
