Masallıda RİH-nin təşkilatçılığı ilə “Yaşıl dünya boyalarda” mövzusunda tədbir keçirilib. Bu haqda məlumatı Cenublu.az bu gün, 26 aprel tarixində verir.
Görüşdə RİH-nin başçısı Araz Əhmədov bildirib ki, Azərbaycan Respublikasının Prezidenti cənab İlham Əliyevin 25 dekabr 2023-cü il tarixli Sərəncamı ilə Azərbaycan Respublikasında 2024-cü il “Yaşıl dünya naminə həmrəylik ili” elan edilib.
Sonra Mənzil Kommunal Təsərüffatı İstehsalat Birliyinin Yaşıllaşdırma şöbəsinin rəisi Adbala Əmənov, RİHB-nin Türkoba kənd İnzibati Ərazi Dairəsi üzrə nümayəndəsi Leyla Əzizova rayon ərazisində görülmüş və il ərzində icrası nəzərdə tutulmuş işlər barədə ətraflı məlumat veriblər.
Daha sonra Onbirillik İncəsənət Məktəbi, Dövlət Rəsm Qalereyası, ümumtəhsil məktəbləri, Uşaq və Gənclərin İnkişaf Mərkəzinin şagirdlərinin əl işlərindən ibarət sərgiyə baxış keçirilib. Sərgidə əməyi olan şagirdlər Araz Əhmədov tərəfindən qiymətli hədiyyələrlə mükafatlandırılıblar.
Yekunda Onbirillik İncəsənət Məktəbinin xalq çalğı alətləri ansamblı və şagirdlərinin ifasında canlı musiqi, Üzeyir Hacıbəyovun “Cəngi” əsərinin sədaları altında xoreoqrafiya sinfinin şagirdlərinin rəqsi təqdim edilib.
