N.Həsənov adına Masallı rayon Göyəçöl kənd orta məktəbində “Narkomaniyaya qarşı mübarizə sağlam həyatın təminatıdır” mövzusunda maarifləndirici tədbir keçirilib. Bu haqda məlumatı Cenublu.az bu gün, 8 dekabr tarixində verir.
Tədbirdə Masallı Rayon Polis Şöbəsinin rəisi, Masallı Rayon İcra Hakimiyyətinin, Masallı rayon Polis Şöbəsinin, Lənkəran-Astara Regional Təhsil İdarəsinin Masallı rayonu üzrə Təhsil sektorunun, Lənkəran-Astara Regional Gənclər və İdman İdarəsinin Masallı rayon sektorunun əməkdaşları, müəllimlər, şagirdlər və valideynlər iştirak ediblər.
Çıxışlarda əsrin bəlası olan narkomaniyaya qarşı mübarizəni təmin etmək məqsədilə bu cür görüşlərin keçirilməsinin mühüm əhəmiyyətə malik olduğu diqqətə çatdırılıb və sağlam cəmiyyətin formalaşması istiqamətində ən ciddi təhlükələrdən olan narkomaniyanın törətdiyi fəsadlar barədə ətraflı məlumat verilib.
Sonda məktəblilərin sualları cavablandırılıb və müzakirə olunan məsələlərlə bağlı videoçarxlar tədbir iştirakçılarına nümayiş etdirilib.
Tədbir Masallı Rayon İcra Hakimiyyətinin, Masallı Rayon Polis Şöbəsinin, Lənkəran-Astara Regional Gənclər və İdman İdarəsinin Masallı rayon sektorunun, Lənkəran-Astara Regional Təhsil İdarəsinin Masallı rayon sektorunun birgə təşkilatçılığı ilə keçirilib.
