Masallı rayonunda Səyyar Gənclər Xidməti layihəsi çərçivəsində “Narkomaniyaya yox deyək!” adlı təlim təşkil edilib.
Cenublu.az Azərtac-a istinadən xəbər verir ki, tədbir Azərbaycan Respublikası Gənclər Fondunun təşkilatçılığı ilə baş tutub. Görüşə Gənclərin İnkişaf və Karyera Mərkəzinin baş direktoru Azər Əliyev, Dövlət Komissiyasının daimi fəaliyyət göstərən İşçi qrupunun baş məsləhətçisi Şahin İsmayılov, Masallı RİH-nin başçısı Araz Əhmədov və digər dövlət qurumlarının nümayəndələri cəlb olunublar.
Təlim zamanı gənclərin narkotik asılılığı probleminə dair biliklərinin artırılması məqsədilə risk amilləri, psixoaktiv maddələrin xüsusiyyətləri və onların sağlamlığa zərərli təsiri, gənclərin asudə vaxtlarının səmərəli təşkili, “802 - Qaynar xətt”in fəaliyyət istiqaməti və digər məsələlər barədə ətraflı məlumat verilib, gəncləri maraqlandıran suallar ətrafında müzakirələr aparılıb.
Yekununda Dövlət Komissiyasının daimi fəaliyyət göstərən İşçi qrupu tərəfindən hazırlanmış “Narkotiklər haqqında həqiqəti bilin”, “Marixuana haqqında həqiqət” və “Psixotrop maddələr haqqında həqiqət” adlı zəruri təbliğat materialları gənclərə təqdim edilib.
