Masallıda Vətən müharibəsi döyüşçülərinə həsr olunmuş tədbir keçirilib. Bu haqda məlumatı Cenublu.az bu gün, 28 oktyabr tarixində verir.
"Qəhrəmanları tanıyaq" layihəsi çərçivəsində keçirilən görüş Cavanşir Qasımov adına Bambaşı kənd tam orta məktəbində baş tutub. Burada şəhid valideynləri, qazilər, mədəniyyət işçiləri, müəllimlər və şagirdlər iştirak ediblər. Onlara cəbhədə qazanılan nailiyyətlər, Ermənistan silahlı qüvvələrinə endirilən sarsıdıcı zərbələr barədə məlumat verilib.
Sonda şəhid atası Gündüz Qədiməliyev övladının, qazi Ülvi Sərdarlı, Fərid Sadıqov, Nurlan Məlikov, Talib Qəzənfərli isə özlərinin keçdikləri döyüş yolundan danışıblar.
Qeyd edək ki, tədbir Masallı Tarix-Diyarşünaslıq Muzeyinin təşkilatçılığı, Lənkəran-Astara Regional Təhsil İdarəsinin Masallı rayon üzrə təhsil sektorunun dəstəyi ilə həyata keçirilib.
