Masallıda “Sağlam ailə, davamlı gələcək” adlı tədbir təşkil olunub. Bu haqda məlumatı Cenublu.az bu gün, 16 may tarixində verir.
Beynəlxalq Ailə Günü münasibətilə keçirilən görüş Masallı şəhər Gənclər evində baş tutub. Burada RİH-nin başçısı Araz Əhmədov və aparatı, idarə, müəssisə və təşkilat rəhbərləri, eləcə də rayon ağsaqqalları, ziyalıları, media əməkdaşları və gənclər iştirak ediblər.
Tədbirdə çıxış edən rayon rəhbəri mövzu ətrafında geniş məlumatlar verib. O bildirib ki, hər bir xalqın, millətin mövcudluğu onun ana dilinə, adət-ənənələrinə, öz mədəniyyətinə bağlılığından asılıdır. Azərbaycan xalqının çox gözəl və zəngin ailə ənənələri var.
Daha sonra Qafqaz Müsəlmanları İdarəsinin rayon üzrə Qazısı Rəşid Talıbov İslam dinində ailə əxlaqı, ailə təməli və qarşılıqlı hüquqlardan, ailə münasibətlərindən, Masallı Regional “ASAN Xidmət” Mərkəzində Qeydiyyat şöbəsinin rəisi Rabi İsayev isə Ailə məcəlləsi, nikah müqaviləsi anlayışı, nikahın qeydə alınması mövzusunda geniş söhbət açıblar.
Yekunda Masallı Regional “ASAN Xidmət” Mərkəzinin Qeydiyyat şöbəsində nikaha daxil olmaq üçün müraciət etmiş iki gəncə Araz Əhmədov tərəfindən Nikah Haqqında Şəhadətnamə və qiymətli hədiyyələr təqdim edilib.
Görüş Masallı RİH-nin təşkilatçılığı ilə həyata keçirilib.
