Masallıda “Korrupsiyaya qarşı mübarizənin gücləndirilməsi” mövzusunda interaktiv tədbir baş tutub. Bu haqda məlumatı Cenublu.az bu gün, 5 dekabr tarixində verir.
Görüş Heydər Əliyev Mərkəzində Masallı Rayon İcra Hakimiyyətinin təşkilatçılığı ilə həyata keçirilib. Burada Rayon İcra Hakimiyyəti başçısı aparatının Hüquq şöbəsinin müdiri Bəxtim Qarayev çıxış edərək, korrupsiyaya qarşı mübarizə, etik davranış qaydaları, onlara əməl edilməsi ilə bağlı hüquqi mexanizmlər və bu sahədə dövlət siyasətinin həyata keçirilməsinin olduqca vacib olduğunu bildirib.
Mövzu ətrafında Ombudsmanın Cənub Regional Mərkəzinin direktoru Ziya İsmayılov korrupsiyaya qarşı mübarizənin normativ və institusional əsaslarının təkmilləşdirilməsi, eləcə də korrupsiyaya qarşı mübarizə ilə əlaqədar götürülmüş öhdəliklərin həyata keçirilməsi, korrupsiyanın qarşısının alınması barədə geniş məlumat verib.
Tədbirdə, həmçinin Rayon İcra Hakimiyyəti başçısı aparatının Baş məsləhətçisi Nuranə Muradova, Ağsaqqallar Şurasının sədri Ələşrəf Niftiyev, qeyri-hökumət təşkilatlarının sədrləri Qardaş Fətullayev, Məmmədağa Şiriyev, Fidan Abbaslı, Əfrayıl Fərziyev, Saleh Qurbanov, Rauf Cəbiyev və başqaları çıxış ediblər.
Sonda korrupsiyaya qarşı mübarizə sahəsində fəaliyyət göstərən vətəndaş cəmiyyəti institutları ilə dövlət orqanları arasında əməkdaşlığın daha da gücləndirilməsi və birgə layihələrin həyata keçirilməsi istiqamətində belə maarifləndirici tədbirlərin məktəblərdə keçirilməsi təklif olunub.
