Masallı rayon Mərkəzi Kitabxanasının təşkilatçılığı ilə “100 il oxucuların xidmətində” adlı yubiley tədbiri baş tutub. Bu haqda məlumatı Cenublu.az bu gün, 24 aprel tarixində verir.
Tədbir çərçivəsində kitab sərgisi həyata keçirilib. Buraya rayon ictimaiyyətinin nümayəndələri, idarə və müəssisələrin rəhbərləri cəlb olunublar.
Sərgidə Heydər Əliyevin həyat və fəaliyyətini əks etdirən kitablar, 44 günlük Vətən müharibəsindəki tarixi Zəfərimizə həsr olunan nəşrlər, yerli və xarici yazarların əsərləri nümayiş olunub. Gənc oxuculara isə açıq havada kitab oxumaq şəraiti yaradılıb.
Sonda Mərkəzi Kitabxana ilə mədəni-kütləvi tədbirlərin təşkilində birgə əməkdaşlığa görə rayonun bir sıra idarə və təşkilatları, habelə nümunəvi və fəal oxucular kitabxananın fəxri fərman, təşəkkürnamə və hədiyyələri ilə mükafatlandırılıb.
