Masallı Tarix-Diyarşünaslıq Muzeyində “Qəhrəmanlarımızı tanıyaq” layihəsi çərçivəsində “Əbədiləşən ömürlər” adlı tarix dərsi keçirilib. Bu haqda məlumatı Cenublu.az bu gün, 3 may tarixində verir.
44 günlük Vətən müharibəsi şəhidi Famil Habil oğlu Əlizadənin 25 illik yubileyinə həsr olunmuş anım tədbirində Nəriman Nərimanov adına şəhər 2 saylı tam orta məktəbinin müəllim və şagirdləri iştirak ediblər.
Muzeyin direktoru Əntiqə Tağıyeva 1990-cı illərdən bu günə qədər erməni vandallarının Qarabağ ərazisində törətdikləri böyük cinayətlər və bunun ölkəmizə, xalqımıza vurduğu mənəvi, maddi ziyanlarından danışıb. O, 30 illik mübarizəyə söykənən Zəfərdən də şagirdlərə ətraflı məlumat verib.
Sonra muzeyin əməkdaşı Sevinc Əliyeva 44 günlük Vətən müharibəsində şəhid olan qəhrəmanımız Əlizadə Famil Habil oğlunun həyat və döyüş yolu haqqında geniş məruzə edib.
Sonra şagirdlərə rayon şəhidləri ilə bağlı suallar verilərək onlarla mövzu ətrafında fikir mübadiləsi aparılıb.
Tədbirdən sonra muzey əməkdaşları şəhid Famil Habil oğlu Əlizadənin məzarını ziyarət edərək ruhuna dualar oxuyublar.
