Masallı rayon Heydər Əliyev Mərkəzində 8 Mart - Beynəlxalq Qadınlar Gününə həsr olunmuş “Qadın ömrü həyatın fəlsəfəsi”adlı tədbir keçirilib. Bu haqda məlumatı Cenublu.az bu gün, 7 mart tarixində verir.
Tədbirdə çıxış edənlər bildiriblər ki, Azərbaycan ailəsində qadının yeri və rolu xüsusi əhəmiyyət daşıyır. Azərbaycan qadını yeni nəsil dünyaya gətirmək, onu tərbiyə etmək, Vətənə layiq böyütmək kimi çox vacib bir vəzifəni yerinə yetirməklə bərabər, ailənin möhkəmliyi və bütövlüyünün qorunması məsuliyyətini də könüllü surətdə daşıyır. Qadın həyat yoldaşına hörmət edən, ailə ocağını daim isidəndir. Azərbaycan qadını öz fəaliyyətini maarifçilik və xeyriyyəçilik ideyalarının yayılmasından başlayaraq, mədəni, dini, milli-mənəvi dəyər və ənənələri də nəzərə almaqla davam etdirir. Daha sonra şəhid anası Mehriban xanım çıxış edərək bildirib ki, ülvilik, zəriflik və gözəllik rəmzi olan qadın adı, ana adı ölkəmizdə həmişə uca tutulub. Azərbaycan qadını bütün dövrlərdə öz istedadı, zəkası, iradəsi və əzmi ilə milli - mənəvi dəyərlərimizin qorunub saxlanması və yaşadılmasında müstəsna xidmətlər göstərib.
Tədbirdə iştirak edən ziyalı xanımlardan Məhbubə Şahbazova, Dilarə Hüseynova, Lətifə Qəmbərzadə, Kinəxanım Əliyeva, Günay Xəlilova bütün xanımları 8 Mart - Beynəlxalq Qadınlar Günü münasibətilə səmimi-qəlbdən təbrik edərək, onlara möhkəm cansağlığı və fəaliyyətlərində uğurlar arzulayıblar.
Sonda xanımlar üçün təşkil olunmuş çay süfrəsi arxasında mövzu ilə bağlı maraqlı diskussiya aparılıb.
Qeyd edək ki, tədbir Masallı rayon Heydər Əliyev Mərkəzi və Masallı rayon Tarix-Diyarşünaslıq Muzeyinin birgə təşkilatçılığı ilə ərsəyə gəlib.
