Lənkəran Dövlət Universitetinin İqtisadiyyat və innovativ idarəetmə kafedrasının baş müəllimləri Bakıda keçirilən İqtisadi Əməkdaşlıq Təşkilatına üzv dövlətlərin turizm üzrə təhsil müəssisələrinin 1-ci görüşündə iştirak ediblər. Bu haqda məlumatı Cenublu.az bu gün, 6 dekabr tarixində verir.
Azərbaycan Respublikasının Dövlət Turizm Agentliyi və İqtisadi Əməkdaşlıq Təşkilatının birgə təşkilatçılığı ilə keçirilən görüşdə Lənkəran Dövlət Universitetinin İqtisadiyyat və innovativ idarəetmə kafedrasının baş müəllimləri – i.ü.f.d. Fərid Xankişiyev və Şəfa Bağırova təmsil ediblər.
Görüşdə Azərbaycan, Türkiyə, Qazaxıstan, Özbəkistan, Türkmənistan, Qırğızıstan, Tacikistan, İran və Pakistan daxil olmaqla təşkilatın 9 üzv ölkəsindən rəsmi dövlət nümayəndələri və turizm təhsili müəssisələrinin təmsilçiləri, həmçinin BMT-nin Ümumdünya Turizm Təşkilatının nümayəndələri iştirak ediblər. Tədbirdə “Dövlət, Təhsil və Sənayenin Əlaqələndirilməsi: turizm təhsilində ən yaxşı təcrübələr”, "Kurrikulum tərtibatı: gələcək tələbat üçün turizm təhsilinin yaxşılaşdırılması”, “İnnovasiya və Texnologiya: turizm təhsilində yeni trendlər” mövzusunda panel müzakirələri aparılıb.
