Lənkəran Dövlət Universitetinin (LDU) mətbuat xidmətinin rəhbəri Esmira İsmayılova universitetdə sağlamlıq imkanları məhdud tələbələr üçün şəraitin olub-olmaması barədə açıqlama verib. Bu haqda məlumatı Cenublu.az bu gün, 26 oktyabr tarixində AzEdu.az-a istinadən verir.
O qeyd edib ki, Lənkəran Dövlət Universitetində əlilliyi olan tələbələr üçün imkanlar yaradılıb və universitetdə bu sahədə yerli və Avropa təcrübəsindən geniş istifadə olunur.
“Lənkəran Dövlət Universitetinin tərəfdaş olduğu ESFİDİP (Əlilliyi olan şəxslərin Azərbaycan ali təhsil müəssisələrinə inteqrasiyasının təməlinin qoyulması) TEMPUS qrant layihəsi çərçivəsində Lənkəran Dövlət Universiteti Əmək və Sosial Problemlər üzrə Elmi Tədqiqat və Tədris Mərkəzi və Əlil Təşkilatları İttifaqının nümayəndələri birgə bu sahədə əməkdaşlıq etmişlər. Layihə çərçivəsində Lənkəran Dövlət Universitetində “Əlil tələbələr üçün mərkəz yaradılmış”, mərkəz müasir avadanlıqlarla təchiz edilmiş, əlillərin tədris alması məqsədilə 2 saylı tədris binasında onlar üçün panduslar, lift quraşdırılmış və digər lazımi avadanlıqlarla təchiz edilmişdir.
“Əlilliyi olan tələbələr üçün Mərkəz”in fəaliyyəti sağlamlıq imkanları məhdud tələbələrə aid məsələləri təşkil və idarə etməkdən ibarətdir. Mərkəzin əsas funksiyası əlilliyi olan tələbələrə təhsildə dəstək olmaq üçün onları məlumatlar və xidmətlərlə təmin etməkdən ibarətdir.
Universitetdə gözdən əlil tələbələr üçün tədrisin təşkili məqsədilə ixtisaslaşdırılmış rəqəmsal laboratoriya fəaliyyət göstərir və o laboratoriya müasir rəqəmsal avadanlıqla təchiz edilmişdir”, – deyə mətbuat xidmətinin rəhbəri bildirib.
