Lənkəranın sənətkarlar kəndi olan Separadidə bir vaxtlar 30-a yaxın ailə dulusçuluqla məşğul olub. İndi kəndin yeganə dulusçusu olan Zahid Əkbərov ata-baba sənətinə kiçik yaşlarından maraq göstərib. İllər ötdükcə bu sahədə püxtələşən sənətkarın 60-a yaxın yaşı var. O deyir ki, palçıqdan nə ərsəyə gətirmək mümkündürsə, düzəldir.
O, usta babasından miras qalan 120 yaşlı dulusçuluq çarxına motor qoşaraq müasirləşdirib. Həm işini asanlaşdırıb, həm də istehsal daha tez başa gəlir. Usta deyir ki, əgər sifariş olarsa, bir günə 100-150 piti qabı hazırlaya bilər.
Usta saxsı qablarla yanaşı, təndirlər də düzəldir. Təndirlərin ölçüsü isə sifarişçilərin istəyindən asılıdır.
Usta Zahidin şagirdləri də var. Bu, itmək təhlükəsi olan qədim dulusçuluq sənətinin yaşamasına ümidləri artırır:
“Bu yaxınlarda Laçına aparıblar, orada Prezident mənə tapşırdı ki, bunu uşaqlara öyrədim. İndi bu sənəti nəvələrimə öyrədirəm. Gələcək nəsil üçün qalsın bu sənət”.
Kölgədə qurudulan qablar kürədə bir neçə günə rəngi qızarana kimi bişirilir. Hər il minlərlə saxsı qab ərsəyə gətirən ustanın hazırladıqlarına xarici turistlər də maraq göstərirlər. Hətta sifariş edib öz ölkələrinə aparırlar.
