Lənkəran sakini Aysel Hüseynovanın balıqqulağı və dəmir pullardan hazırladığı sənət əsərləri təkcə yerli sakinlərin deyil, rayona səyahət edən xarici turistlərin diqqətini çəkir. Bu haqda məlumatı Cenublu.az bu gün, 21 fevral tarixində Azertac-a istinadən verir.
Aysel Hüseynova 10 ilə yaxındır ki, bir-birindən maraqlı əsərlər yaradır. İxtisasca müəllim olmasına baxmayaraq, təsviri incəsənətin tətbiqi sənət növünə daha çox maraq göstərir. Bu maraq onu balıqqulağı və dəmir pullardan gözəl əsərlər yaratmağa qədər gətirib çıxarıb.
Onda ilk dəfə bu işə maraq Lənkəran Peşə Liseyinin əməkdaşı Fazil müəllimin tələbələr üçün keçirdiyi master-klas zamanı yaranıb:
“Əl işlərim 3-7 günə ərsəyə gəlir. Hətta bir ay davam edən işlərim də olur. Bu, işin həcmindən, ideyasından və istifadə edilən məhsullardan asılıdır. Müxtəlif ölçülü balıqqulaqlarını dəniz kənarından yığıram və xüsusi kimyəvi məhlullarda saxladıqdan sonra ölçüləri üzrə ayırıb istifadə edirəm. Dəmir pullardan olan əl işlərimə gəlincə, əsasən, 1 qəpiklik sikkələrdən istifadə edirəm. Belə əl işini yaratmaqda məqsədim insanlara stimul verməkdir. Qəpikləri zədələmədən və üzərində heç bir dəyişiklik etmədən istifadə edirəm. İstənilən vaxt bu pullardan təkrar istifadə etmək mümkündür”.
Aysel Hüseynova deyir ki, əl işləri öz gözəlliyi ilə xarici turistlərin də diqqətini çəkir. Lənkərana gələn bir çox turist onun əl işlərini alaraq aparır.
O, gələcəkdə əsərlərindən ibarət sərgi açmaq arzusundadır. Qeyd edək ki, Aysel Hüseynovanın əl işləri bir çox sərgi və festivallarda nümayiş olunub.
[URIS id=54223]
