Lənkəranda “Tirmə şallı, al yanaqlı gözəllər” adlı tədbir keçirilib. Bu haqda məlumatı Cenublu.az bu gün, 8 mart tarixində verir.
Mərasimdə Lənkəran, Astara, Lerik, Yardımlı, Masallı, Cəlilabad rayonlarından olan gənc xanımların əl işləri, milli üslubda olan yaradıcılıq, xalçaçılıq, xalq tətbiqi sənət nümunələri, rəsm əsərləri təqdim olunub. Həmçinin Lənkəran Dövlət Peşə Təhsili Mərkəzinin şagirdləri və Lənkəran şəhər Osman Mirzəyev adına qarışıq tipli uşaq evinin xalçaçı qızlarının əl işləri də nümayiş edilib.
Əlavə olaraq, qonaqlara musiqi və rəqs nömrələri təqdim edilib.
Tədbirə “Masallı Gənclər Evi” sosial xidmət müəssisəsinin əməkdaşları, min nəfərdən çox regiondan gələn qonaqlar və şəhər sakinləri cəlb olunublar.
Mərasim Lənkəran-Astara Regional Gənclər və İdman İdarəsi, Lənkəran Şəhər İcra Hakimiyyəti, Lənkəran-Astara Regional Mədəniyyət İdarəsinin təşkilatçılığı, Lənkəran Gənclər Evinin tərəfdaşlığı ilə keçirilib.
