Lənkəran şəhərində Lənkəran-Astara Regional Təhsil İdarəsinin tabeliyində fəaliyyət göstərən ümumtəhsil müəssisələrinin direktorları üçün maarifləndirmə seminarı baş tutub. Bu haqda məlumatı Cenublu.az bu gün, 24 oktyabr tarixində verir.
Görüş şəhərin 1 nömrəli orta məktəbində təşkil olunub. Burada Fövqəladə Hallar və Elm və Təhsil nazirliklərinin nümayəndələri, adıçəkilən idarənin əməkdaşları və digər qonaqlar iştirak ediblər.
Təlimin keçirilməsində məqsəd məktəblərdə təhsil alan uşaq və yeniyetmələri təbii və texnogen xarakterli fövqəladə hallarla tanış etmək üçün təhsil işçilərinə bu istiqamətdə səmərəli iş aparılmasına metodiki köməklik göstərmək olub.
Sonra fövqəladə hallarla bağlı zəruri davranış qaydaları, habelə məktəblərdə maarifləndirmə işinin təşkili ilə əlaqədar geniş məlumat verilib. Həmçinin burada mövzuya dair videoçarxlar təqdim olunub və suallar ətraflı cavablandırılıb.
Qeyd edək ki, tədbir Fövqəladə Hallar Nazirliyinin dəstəyi, Elm və Təhsil Nazirliyinin təşkilatçılığı ilə keçirilib.
