Lənkəran Mərkəzi Kitabxanasında uşaq ədəbiyyatının istedadlı nümayəndəsi, Azərbaycan Yazıçılar Birliyinin üzvü şair Əyyub Türkayla görüş keçirilib. Bu haqda məlumatı Cenublu.az bu gün, 10 iyul tarixində verir.
Görüş çərçivəsində uşaqlar Lənkəran Mərkəzi Kitabxanasında təşkil olunmuş ənənəvi kitab sərgisi ilə tanış olublar. Sərgidə uşaqlara kitablar haqqında məlumat verilib.
Açıq havada təşkil olunmuş tədbiri giriş sözü ilə açan kitabxananın Xidmət şöbəsinin müdiri Xədicə Məmmədova bildirib ki, görüşün məqsədi uşaqlar arasında mütaliə mədəniyyəti və oxu vərdişini formalaşdırmaqdır.
Sonra şair-publisist Əyyub Türkay oxuculara yaradıcılığı haqqında geniş məlumat verib, tədbir iştirakçılarını qələmə aldığı uşaq kitabları ilə tanış edib. Ə.Türkay səmimi görüşün təşkilinə görə Lənkəran Mərkəzi Kitabxanasının rəhbərliyinə təşəkkürünü bildirib.
Tədbirdə şəhər 5 saylı Körpələr evi-uşaq bağçasının "Nəvələr" qrupunun ifası maraqla qarşılanıb. Yekunda uşaqlara kitab paylanılıb.
