Lənkəran şəhərində Vətən müharibəsi şəhidi Tural Hümmətov haqqında “Nakam ömrün akkordları” adlı sənədli filmin təqdimatı keçirilib. Bu haqda məlumatı Cenublu.az bu gün, 4 noyabr tarixində verir.
Təqdimat mərasimi Qəni Vəliyev adına Lənkəran şəhər Mədəniyyət Mərkəzində baş tutub. Burada şəhidin doğmaları və yaxınları, döyüş yoldaşları, qazilər, şəhid ailələri, rayon rəsmiləri, mədəniyyət, media, ictimaiyyət nümayəndələri iştirak ediblər.
Filmdə şəhidin doğulduğu gündən şəhid olduğu vaxta qədər keçdiyi həyat yolu işıqlandırılıb. Şəhidin uşaqlıq dostları, qohumları, müəllimləri, döyüş yoldaşları onunla bağlı xatirələrini bölüşüblər.
Xatırladaq ki, filmin rejissoru Anar Kəkəyev, quruluşçu operatoru isə Habil Əliyevdir.
Qeyd edək ki, Tural Hümmətov 20 may 1998-ci ildə Lənkəran rayonunun Tatoba kəndində anadan olub. O, Vətən müharibəsi zamanı Hadrut qəsəbəsinin, Füzulinin və Şuşanın azad edilməsi uğrunda gedən döyüşlərdə savaşıb. 7 noyabr tarixində Şuşanın azad edilməsi uğrunda aparılmış döyüş zamanı şəhid olub. Lənkəran rayonunda dəfn edilib.
Tural Hümmətov ölümündən sonra “Vətən uğrunda” və “Xocavəndin azad olunmasına görə” medalları ilə təltif edilib.
