Lənkəran şəhərində uşaqların peyvəndlənməsi ilə bağlı seminar baş tutub. Bu haqda məlumatı Cenublu.az bu gün, 18 noyabr tarixində Report.az-a istinadən verir.
“Heç bir uşağı peyvənddən kənarda qoymayaq” şüarı altında keçirilən tədbirə Lənkəran, Lerik, Yardımlı, Masallı və Astara rayonlarında fəaliyyət göstərən 117 nəfər pediatr və tibb bacısı, həmçinin 44 nəfər peyvənddən imtina edən valideyn qatılıblar.
Tədbirin birinci hissəsində AzPC-nin idarə heyətinin üzvləri və Səhiyyə Nazirliyinin mütəxəssis-ekspertləri Nigar Bayramova, Erkin Rəhimov və Əli Quliyev tərəfindən valideynlərə peyvəndlə bağlı tərəddüdlər barəsində məlumat verilib və onların sualları cavablandırılıb. Daha sonra AzPC-nin mütəxəssisləri tibb işçiləri üçün uşaq vaksinasiyası, peyvəndlə qarşısı alına bilən xəstəliklərin ağırlaşmaları, yanlış əks göstərişlər və s. mövzuları əhatə edən sessiyalar keçiriblər.
Xatırladaq ki, tədbir Ümumdünya Səhiyyə Təşkilatı və Azərbaycan Pediatriya Cəmiyyəti (AzPC) tərəfindən Tibbi Ərazi Bölmələrini İdarəetmə Birliyinin (TƏBİB) dəstəyi və Səhiyyə Nazirliyi və İcbari Tibbi Sığorta üzrə Dövlət Agentliyinin birgə təşkilatçılığı ilə həyata keçirilib.
