Ramazan bayramı hər bir müsəlmanın böyük həvəslə gözlədiyi dini bayramlardan biridir. Bu ayda insanların sevərək oruc tutması, qohumların bir-birinin evinə gedib bayramlaşması, xanımların iftara xüsusi hazırlaşması, gözəl süfrə açıb qonaq qəbul etmələri kimi ənənələr var. Bunlarla yanaşı, bəziləri restoranlara üz tutmağı və fərqli dadlar sınamağı da üstün tuturlar.
Elə bu səbəbdən Cenublu.az Lənkəranda fəaliyyət göstərən və iftar menyusu təqdim edən restoranlar haqda kiçik bir araşdırma aparıb.
Qala Xiyabani, 26 ünvanında yerləşən “Boranı” restoranında iftar menyusuna su, xurma, firni və hər günə özəl şorba, salat, əsas yemək, qarnir və istəyə uyğun içki daxildir. 1 nəfər üçün qiymət 7 manat təşkil edir.
Dəmir yolu vağzalının yanında yerləşən “Taksim corner&lounge” restoranında başlanğıc olaraq su, peşməy, külçə, yağ, pendir, firni, çay, daha sonra paytaxt salatı, toyuq şorbası, izqara köftə və kəndsayağı kartof təklif olunur. 1 nəfər üçün qiymət 11 manat təşkil edir.
Qala Xiyabani, 17 ünvanında yerləşən “A’love” restoranında 1 nəfər üçün menyu 10 manat təşkil edir. Bura mərci şorbası, salat (çoban, paytaxt və ya mimoza), əsas yemək (qəssab köftə, plovüstü toyuq dönəri və ya süzməli tantuni ət ilə), içki (cola, fanta və ya sprite), çay (mürəbbə və ya kurabiyə) xurma və çörək daxildir.
Aşağı Nüvədi kəndində yerləşən “Khazar palace” restoranı iftar menyusuna 20 % endirim elan edib. Yəni 20 % endirim bütün seçəcəklərinizə aid ediləcək.
Lənkəran-Lerik şosesinin 8-ci km-də yerləşən “Riva Hill Resort” restoranında iftar menyusuna başlanğıc olaraq çörək, xurma və firni daxildir. Şorbalardan - mərci, çolpa, dovğa və ya göy şorbası, salatlardan paytaxt, manqal və ya mimoza, isti yeməklərdən isə dolma (qatıq ilə) və ya plov (çolpa çölmə, turşu kabab və ya çöl quşları) arasında seçim edə bilərsiniz. Həmçinin menyuya pendir assorti, tərəvəz çələngi, qazsız su və kompot daxildir. Qiymət isə 1 nəfər üçün 20 manat təşkil edir.
Haftoni qəsəbəsində yerləşən “Dad house” restoranı başlanğıc olaraq, xurma, bal, qaymaq, pendir, zeytun, pomidor, xiyar, qoz, qaysı və sıyıq təklif edir. Daha sonra günün şorbası, çoban salatı, paytaxt salatı, blinçik, ana yeməklərdən isə ət və ya toyuq seçimi var. Həmçinin restoran iftar menyusuna çay və şirniyyat da daxil edib. Menyunun qiyməti 25 manatdır. Restoranda 10% servis haqqı da mövcuddur.
