Qəhvə dünyada sudan sonra ən məşhur içki hesab olunur. Ölkəmizdə də son dövrlər ərzində gündəlik qəhvə qəbulu insanlar tərəfindən vərdişə çevrilib. Əsasən, gənclər arasında populyarlıq qazanan bu içki Lənkəranda da son zamanlar məşhurlaşıb.
Elə bu səbəbdən Cenublu.az izləyicilər üçün Lənkəranda fəaliyyət göstərən və sınanmış “coffee shop”lar haqda məlumat verir.
Əsasən, gənclərin getdiyi məkanlardan olan “Tor coffee shop” şəhərin Qala Xiyabani küçəsi, 13 ünvanında yerləşir. Burada siz qəhvənin, demək olar ki, bütün növlərini dada bilərsiniz. Həmçinin qəhvə ilə yanaşı, qonaqlara vafli çeşidləri və çərəzlər də təklif olunur.
“Lighthouse coffee shop” şəhərin Həzi Aslanov Xiyabanı, Dəmiryol vağzalının qarşısında yerləşir. Burada da, həmçinin qəhvənin bir çox növünü dada, maraqlı desertlər sifariş verə bilərsiniz.
Digah-Şiləvar yolunda yerləşən “Lankon coffee shop”da isti və soyuq qəhvələrlə yanaşı, bir-birindən fərqli desertlər dada bilərsiniz. Həmçinin məkanda şənbə və bazar günləri səhər yeməyi də təklif olunur.
Qeyd edək ki, əsrlər boyunca alimlər arasında kofeinin orqanizmə xeyrinin və ya zərərinin olması ilə bağlı fikir ayrılıqları mövcuddur. Lakin unutmayaq ki, istənilən bir məhsulu normadan artıq tükətmək sağlamlığımıza xeyirdən çox ziyan verir. Bununla bağlı dahi Nizami Gəncəvinin sözlərini yada salmaq istərdik: “İnci bir saflığı varsa da suda, artıq içiləndə dərd verir o da”.
