Lənkəranda çillə gecəsi qeyd olunub. Bu haqda məlumatı Cenublu.az bu gün, 21 dekabr tarixində Report.az-a istinadən verir.
Milli dəyərlərimizin tərkib hissəsi olan bu gecənin ən əhəmiyyətli atributlarından biri qarpızdır. Bayram günü, demək olar ki, bütün evlərdə çillə qarpızı kəsilir. Əksər ailələr belə qarpızları əvvəlcədən alıb saxlayır. Çillə qarpızına bolluq, bərəkət rəmzi kimi baxılır. Çillədə qarpız kəsəndə deyərlər: "Ay qarpız, mən səni necə kəsirəmsə, çilləni də belə tez kəsim". Nişanlı qızlara da oğlan evindən xonçada qarpız aparılması adəti bu gün də cənub rayonlarında yaşadılır.
Tədqiqatçılar qədim təqvimlərə əsasən, Azərbaycanın milli adətlərindən olan çillə gecəsinin Yerin şimal yarımkürəsində ilin 365 gününün ən uzun gecəsinə təsadüf etdiyini qeyd edirlər. Bu gecə şəmsi ilinin dey ayının başlanğıc gecəsi, azər ayının sonuncu gecəsi və Novruz bayramına 3 ay qaldığı bir gecədir. Çillə sözü bir neçə mənada başa düşülür. 40 gün mənasında istifadə edilən bu söz daha çox ağırlığın, çətinliyin başlanğıcı mənasında başa düşülür. Qış fəsli üç hissəyə bölünür.
40 gün davam edən böyük çillənin (21 dekabr - 29 yanvar) ardınca 20 günlük kiçik çillə (29 yanvar - 18 fevral) gəlir və daha sərt olduğundan qışın “oğlan çağı” adlandırılır. Boz ay (oğru buğ) (20 fevral - 20 mart) isə bir ay davam edir.
Miladi təqvimi ilə dekabrın 20-dən 21-nə keçən çillə gecəsi, əsasən, Azərbaycan, İran, Türkiyə və Əfqanıstanda xüsusi qeyd edilir.
