Lənkəranda "Tariximiz qürurumuzdur" layihəsi çərçivəsində AYB-nin üzvü şairə Esmira Günəşin "Cəsur Qəhrəmanlar" adlı kitabının təqdimat mərasimi baş tutub. Bu haqda məlumatı Cenublu.az bu gün, 24 may tarixində verir.
Tədbir Heydər Əliyev Mərkəzində keçirilib. Burada şəhid ailələrinin üzvləri, müharibə əlilləri, veteranlar, rəsmilər, ziyalılar və rayon ictimaiyyətinin nümayəndələri iştirak ediblər.
Mərasimdən əvvəl mərkəzin zalında şəhidlərə həsr olunmuş fotoşəkillərdən ibarət sərgi təqdim olunub. Sonra Vətən müharibəsi barədə ətraflı məlumatlar verilib.
Tədbirdə Lənkəran şəhər 1 nömrəli Cəfər Cabbarlı adına Uşaq Musiqi Məktəbinin müəllim və şagirdləri tərəfindən "Qarabağ şikəstəsi" oxunub və şəhidlərə həsr olunmuş şeirlər səsləndirilib.
Daha sonra söz şəhid analarına verilib. Onlar şəhid ailələrinə göstərilən diqqət və qayğıya görə minnətdarlıqlarını bildiriblər.
Yekunda şairə Esmira Günəşin "Cəsur Qəhrəmanlar" adlı kitabı təqdim olunub.
