Lənkəran Dövlət Dram Teatrı Bakıda “Cəmilə” romantik tamaşasını nümayiş etdirib. Bu haqda məlumatı Cenublu.az bu gün, 17 oktyabr tarixində Azərtac-a istinadən verir.
Romantik drama teatrın bərpasının 50 illiyi münasibətilə nümayiş olunub. Tamaşanın quruluşçu rejissoru İmran Ali Qurban, quruluşçu rəssamı Tərlan Sadıqov, bəstəkarı Azər Hacıəsgərlidir.
Təqdimat zamanı Azərbaycan Teatr Xadimləri İttifaqı sədrinin vəzifə səlahiyyətlərini icra edən Dövlət mükafatı laureatı Hacı İsmayılov çıxış edib və teatrın keçdiyi zəngin inkişaf yolundan söz açıb. Burada Xalq artisti milli teatr sənətinin inkişafındakı xidmətlərinə görə və bərpasının 50 illiyi münasibətilə teatrı İttifaqın Fəxri Fərmanı ilə təltif edib.
Həmçinin teatrın bərpasında xüsusi xidmətləri olan Xalq artisti Qabil Quliyev Fəxri Fərmanla, Xalq artisti Böyükxanım Əliyeva və aktrisa Şahrud Mehdiyeva “Qızılgül” mükafatı ilə təltif olunublar.
Sonda tamaşanın uğurlu quruluşuna görə gənc rejissor İmran Ali Qurban İttifaqın Fəxri Fərmanına layiq görülüb.
Qeyd edək ki, tamaşa Mədəniyyət Nazirliyi və Azərbaycan Teatr Xadimləri İttifaqının “Qonaq Teatr” layihəsi çərçivəsində nümayış olunub.
