Lənkəran rayonunun Kənarmeşə kənd sakini Tərlan Bağırov kartondan maraqlı əl işləri yaradır. Bu haqda məlumatı Cenublu.az bu gün, 13 aprel tarixində Azərtac-a istinadən verir.
Kənarmeşə Kənd Mədəniyyət Evində bədii rəhbər vəzifəsində çalışan sakin kartondan müxtəlif növ avtomobil, ev, musiqi alətləri və digər maketlər hazırlayır. O, bu işi həm də özünün gəlir mənbəyi hesab edir.
“Məndə bu işləri görməyə həvəs uşaqlıqda yaranıb. Hazırladığım maketlər mənim üçün maraqlı görünür. Bu maketləri ölkəmizin hər yerində sərgilərə aparmışam və baxanlar tərəfindən çox bəyənilib. Bir maketin qiyməti 15-20 manatdır. Böyük və kiçik maketlər var və qiymət də buna uyğun tənzimlənir”, – deyə T.Bağırov bildirib.
Usta qeyd edib ki, maketlərin sifarişləri daha çox ona rayona gələn turistlər tərəfindən verilir. Onların hazırlanmasına 1-2 həftə, çətin maketlər üçün isə bəzən daha çox vaxt tələb olunur.
Tərlan Bağırovun əsas məqsədi bu sənəti inkişaf etdirməkdir. Yaradıcılığında, həmçinin plastik qablardan, rəngarəng kağızdan, parça qırıntılarından istifadə edən sənətkar məişət tullantılarının lazımsız materiallar toplusu olmadığını öz nümunələri ilə sübut edir.
[URIS id=57585]
