Vaqo kəndi Astara şəhərindən 20 km şimal-qərb istiqamətində, Təngərud çayının sahilində yerləşir [1].
Alim Budaq Budaqovun yazdığına görə, “vaqo” sözü talış dilindən tərcümədə “ağac kömürü hazırlamaq üçün çala” mənasını daşıyır [3]. Yerli əhalinin sözlərinə görə, keçmişdə bu ərazidə qonşu kəndlərin sakinləri kömür hazırlayırdılar. Bu səbəbdən kənd “Vaqo” adlandırılıb [1]. Yazıçı Musarza Mirzəyevin fikrinə əsasən, kəndin adı “va” (qar) və “qo” (yer) sözlərindən yaranıb, yəni “qarlı yer” anlamını verir [2].
Tarixçi Mirzə Əhməd Mirzə Xudaverdi оğlu tərəfindən fars dilində yazılmış “Əxbarnamə” əsərində bu kənd “Vaqoy” kimi qeyd olunur və onun Vilgic mahalına yaxın ərazidə yerləşdiyi deyilir. Əsərdə tarixçi yazıb ki, talış xanı Qara xana xidmət edən Şahpələng adlı oğlan bu kənddə özünə ev tikib [5].
Vaqo kəndində bir neçə tarixi abidə mövcuddur: tunc dövrünə aid Vaqo kurqanları, orta əsrlərə aid qəbiristanlıq, 1890-cı ilə aid Vaqo Cümə məscidi və s. [4].
Əhali, əsasən, sitrusçuluq, heyvandarlıq və arıçılıqla məşğuldur [7].
1915-ci ilə aid olan siyahıyaalınma məlumatına görə, Vaqo kəndində 1161 nəfərin yaşadığı qeyd olunub [6]. 2017-ci ilin statistik göstəricilərinə əsasən, bu kənddə 2083 nəfər yaşayıb [7].
Ədəbiyyat:
