Müasir İncəsənət Muzeyində heykəltaraş Rahib Qarayevin fərdi sərgisi keçiriləcək. Bu haqda məlumatı Cenublu.az bu gün, 5 dekabr tarixində verir.
“Nağıl kimi” adlı sərgi 23 dekabr 2023-cü il - 10 yanvar 2024-cü il tarixlərində baş tutacaq.
Qeyd edək ki, Rahib Qarayev 8 aprel 1986-cı ildə Masallı rayonunun Qasımlı kəndində anadan olub. 1993-cü ildə Hakim Həsənov adına Qasımlı kənd tam orta məktəbinin 1-ci sinifinə gedib. 2004-cü ildə T.M. Bayraməlibəyov adına Masallı rayonu Yeddioymaq kənd orta məktəbini bitirib. 2000-2008-ci illərdə Masallı rayonun Qasımlı kəndində İlqar Balayevin emalatxanasında heykəltaraşlıq dərsləri alıb. 2008-ci ildə Azərbaycan Dövlət Rəssamlıq Akademiyasının bakalavr pilləsinə daxil olub, 2012-ci ildə bakalavr pilləsini bitirib elə həmin ildə magistratura pilləsinə daxil olub.
2014-cü ildən Azərbaycan Dövlət Rəssamlıq Akademiyasının Heykəltaraşlıq kafedrasında müəllim kimi fəaliyyət göstərir. 2015-ci ildə Azərbaycan Rəssamlar İttifaqının üzvü olub. 2009-cu ildə "Bir millət, iki dövlət", "Amerika mənim gözümlə", 2011-ci ildə Türkiyədə Memar Sinan Universtetində keçirilən simpoziumlarda fəal iştirak edib, 2014-cü ildə "Lermontov", "Əsrin müqaviləsi", həmin ildə keçirilən velosipedçilərə həsr olunmuş sərgidə 2-ci yer mükafatçısı, 2015-ci ildə "Xocalı", "Tolerant Azərbaycan Gənci" adlı sərgidə iştirak edib. 2016-cı ildə Aprel döyüşlərində şəhid olmuş Samir Kaçayevin memorial abidəsinin müəllifidir. 2017-ci ildə Təzəkənd kənd məktəbi üçün Rövşən Nəbiyevin büstünü hazırlayıb. 2019-cu ildə Hakim Həsənov adına Qasımlı kənd tam orta məktəbində qoyulan Hakim Həsənovun heykəlinin müəllifidir. Eyni ilin sentyabr ayında Azərbaycanın yəhudi əsilli Milli Qəhrəmanı, Qarabağ müharibəsi iştirakçısı Albert Aqarunova Bakı şəhərində qoyulmuş heykəlin müəlliflərindəndir.
