Ərəb kəndi Masallı şəhərindən 15 km şimal-şərq istiqamətində yerləşir. Bu kəndin ilk adı Ərəbqədim olub, XIX əsrə aid mənbələrdə isə Ərəbli kimi qeyd olunur [1,2].
Kəndin Ərəb adlandırılması VII əsrdə Azərbaycana ərəblərin gəlişi ilə bağlıdır [2]. VII əsrdən ərəb işğallarının başlaması ilə əlaqədar Azərbaycana xeyli ərəb tayfası köçürülüb. Bəzi mənbələrə görə, xəzər-ərəb müharibələri dövründə Əməvilərin başçısı olan Hişam ibn Abd al-Malik 731-ci ildə şimal sərhədlərini düşmənlərdən qorumaq üçün Azərbaycanda Şamdan (Suriya) gəlmiş 40 min ərəb ailəsi yerləşdirmişdi. Azərbaycan ərazisində məskunlaşan ərəblərin əksəriyyətini Şam, Mosul, Diar, Rəbiə, Yəmən, Xeybər, Xillə, Kufə, Bəsrə və digər dairələrdən gələnlər təşkil edir. XIX əsrə aid tarixi məlumatlara görə, Zaqafqaziyada ərəb komponentli kənd adlarının 29-undan 19-u Bakı quberniyasında idi [3]. Hazırda Ağdam, Laçın, Xaçmaz, Şamaxı, Yevlax, Ağdaş və başqa rayonlarda Ərəb, Ərəbbəsrə, Ərəbqədim, Ərəbocağı adlı toponimlər mövcuddur [2].
Ərəb kəndində antik dövrə aid Əmənkiştəpə nekropolu mövcuddur. Həmin nekropoldan çox sayda mis və gümüş pullar aşkar edilmişdir [5].
1859-1864-cü ilə aid olan siyahıyaalınmaya görə, Ərəb kəndində 211 nəfər yaşayıb [1]. 2009-cu ilin statistik göstəricilərinə əsasən, kənddə 1106 nəfərin yaşadığı qeydə alınıb [4].
Ədəbiyyat:
