Son günlərin trend mahnısına çevrilən “Dünya sənin, dünya mənim” mahnısına ikinci nəfəs vermiş “Darvish band” qrupunun gitaraçısı Anar Bünyad Lerikin Züvünç kəndindən olan Birinci Qarabağ müharibəsi şəhidi Bünyadəli Pələngovun oğludur.
1992-ci ildə Ağdamın Papravənd kəndində şəhidlik zirvəsinə ucalan və Bakıda Şəhidlər xiyabanında torpağa tapşırılan Bünyadəli Pələngov hərbçi həyatından öncə peşəkar səviyyədə gitara ifaçısı olub. Ən sevdiyi müğənni Niyaməddin Musayev olub. Bu sevginin nəticəsi idi ki, Bünyadəli Pələngov qızının adını Niyaməddin Musayevin “Röya” mahnısından götürür.
Pələngovlar ailəsində ən çox səslənən, eşidilən Niyaməddin Musayevin mahnıları olub. Qəhrəmanımızın şəhidlik zirvəsinə ucalmasından sonra bu səs uzun müddət evdən kəsilib.
Lakin illər keçir, şəhidin oğlu Anar Bünyad atasının sənətə və sənətçiyə olan sevgisini davam etdirir və bu sevgidən “Dünya sənin, dünya mənim” mahnısı yeni aranjımanda “dünyaya gəlir”.
Mənbə: Qafqazinfo.az
