26 mart 1998-ci ildə ümummilli lider Heydər Əliyevin imzaladığı fərmana əsasən, 31 mart tarixi “Azərbaycanlıların Soyqırımı Günü” elan edilib. Bu tarix 1918-ci ildə bolşeviklərlə daşnak erməni silahlı dəstələri azərbaycanlılara qarşı apardıqları etnik təmizləmə siyasəti ilə bağlıdır. Soyqıırm zamanı Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti və daşnak ermənilər tərəfindən azərbaycanlılar kütləvi şəkildə vəhşicəsinə qətlə yetirilib.
Lənkəran qəzasında və onun ətrafında törədilən soyqırımın qarşısı Nuru Paşanın rəhbərlik etdiyi Qafqaz İslam Ordusunun 1918-ci ilin sentyabr ayında Azərbaycana gəlişi ilə alınıb. Ordunun Lənkəran qəzasına gələn hissəsinə Camal Yusif Paşa komandanlıq edirdi.
Mart soyqırımları nəticəsində, Lənkəran qəzasında 40-dan çox kənd yandırılıb, yüzlərlə dinc sakin qətlə yeririlib. Gərmətük kəndində bir gün ərzində 70-dək, Mamusta və Kərgəlanda 30-dək, Sütəmurdovda 20-dən çox, Girdənidə 20-dək dinc sakin öldürülüb.
Lənkəran qəzasında ölənlərin sayı dəqiq bilinməsə də, Lənkəran şəhərinin statistik məlumatlarını müqayisə etdikdə əhalinin kəskin azalmasını müşahidə etmək olar. 1915-ci ilə aid statistik məlumata əsasən, Lənkəran şəhərində 13967 nəfər, 1926-cı ildə isə 12078 nəfərin yaşadığı qeyd olunur. Bu isə bir neçə il ərzində əhalinin 1889 nəfər azaldığını göstərir.
