Cenublu.az-ın bugünkü müsahibi həkim-osteopat Tofiq Vəliyevdir.
Müsahibəni təqdim edirik:
- Tofiq bəy, öncə özünüz haqqında məlumat verməyinizi istərdim.
- Lerik rayonunun Babagil kəndində anadan olmuşam. ATU-nun müalicə-profilaktika fakültəsini bitirmişəm. Terapevt kimi Bakı şəhərindəki 5 saylı klinikada fəaliyyətə başlamışam. Sonra öz arzumla Lerik Rayon Mərkəzi Xəstəxanasında işləmişəm. Bir müddət sonra Peştətük kənd xəstəxanasına baş həkim təyin olunmuşam. Hazırda həmin vəzifədə çalışıram. Evliyəm. İki oğul atasıyam.
- Osteopat olmağa necə qərar verdiniz? Bu sahəyə olan marağınız necə başladı?
- Yeniliklərlə həmişə maraqlanmışam. Əsasən Bioloji Təbabət klinikasının keçirdiyi bütün seminar və konfranslarında iştirak etmişəm. Yeni müalicə metodlarını mənimsəmişəm. Sonra isə osteopatiya ilə yaxından maraqlanmışam. Sankt-Peterburqdakı Beynəlxalq Osteopatiya Akademiyasında təhsilimi başa vurduqdan sonra həkim-osteopat kimi fəaliyyətdəyəm. Diplom və sertifikatlarım var.
- Osteopatiya nədir və onun əsas prinsipləri hansılardır?
- Müasir osteopatiyanın banisi amerikalı alim Endryu Teylor Stilldir. Osteopatiya bir elm və fəlsəfə olmaqla əlləri toxundurmaqla bədəndə yaranan üzvi, fizioloji və patoloji prosesləri ayırd edib, müalicə etməkdən ibarətdir.
Osteopatiyanın 4 əsas prinsipi vardır: 1. Orqanizmə bütöv bir sistem kimi baxılır; 2. Orqanizm özü-özünü tənzimləyir, adaptasiya edir və sağlamlığını qoruyur; 3. Struktura və funksiya daim vəhdətdədir; 4. Rasional müalicə bu əsas üç prinsipə əsaslanır.
- Osteopatik müalicə metodları haqqında nə deyə bilərsiniz? Ən çox hansı xəstəlikləri müalicə edirsiniz?
- Osteopatiyanın 4 əsas bölməsi mövcuddur : biodinamik, struktural, kraniosakral və visseral. Burda allopatik yolla müalicəsi mümkün olmayan xəstəlikləri müalicə etmək mümkündür.
- Osteopat həkim olaraq sizin yanaşmanız nə dərəcədə fərqlidir və ənənəvi tibdən hansı əsas fərqləri var?
- Osteopatiyanın ənənəvi təbabətdən üstünlüyü heç bir müalicə vasitəsindən istifadə etmədən, əllərin “möcüzəvi” gücündən yararlanaraq lazımi nəticə əldə etməkdən ibarətdir.
- Müalicə zamanı hansı texnikalardan istifadə edirsiniz? Hər hansı bir xüsusi metodunuz varmı?
- Osteopatiyanın xüsusi texnikaları mövcuddur. Mən əsasən biodinamikanın texnikalarına çox üstünlük verirəm.
- Osteopatik müalicə ilə bağlı ümumi yanlış anlayışlar varmı? İnsanlar nə vaxt osteopat həkimə müraciət etməlidir?
- Bəzən osteopatik müalicəni manual terapiya ilə eyniləşdirirlər. Bu yanlış yanaşmadır. Allopatik təbabətdə heç bir nəticə əldə olunmadıqda insanlar həkim-osteopatlara müraciət etmək məcburiyyətində olurlar. Təəssüflə qeyd etməliyəm ki, hətta həkimlərimiz bu müalicələrin nəticələrinə inanmaq istəmirlər. Bəzilərinin osteopatiya elmi haqqında məlumatları belə yoxdur.
- Osteopatiyanın digər müalicə üsulları ilə birlikdə istifadəsi necədir? Məsələn, fizioterapiya və ya masaj terapiyası ilə necə birləşdirilə bilər?
- Osteopatiyanın bu müalicə metodlarına ehtiyacı yoxdur.
- Osteopat həkim olaraq gələcəkdə bu sahənin inkişafını necə görürsünüz? Yeni texnologiyalar və araşdırmalar barədə hansı fikirləriniz var?
- Elm və texnologiya ildən-ilə təkmilləşdiyi üçün osteopatiya elminin inkişafı prosesi davam edir.
- Cənub bölgəsində çalışırsınız. Burada ən çox rast gəldiyiniz xəstəliklər hansılardır?
- Cənub bölgəmizdə çox rast gəlinən xəstəliklər müxtəlif mənşəli disk yırtıqları və protruziyaları, oynaq patologiyaları (artritlər, artrozlar), skolyozlar, autiz, enurez və digər diskopariyalardır.
- Bu sahənin nə kimi problemləri var?
- Bu sahənin ən böyük problemi xəstələrin həkimə çox gec müraciət etmələridir.
- Gələcəkdə hansı müalicə metodları üzərində daha çox işləmək və ya öyrənmək istəyirsiniz?
- Çalışıram yenilikləri vaxtında qarşılayım və özümdə təkmilləşmələr aparım.
- Çox insan onurğa sütununda disk yırtıqları ilə üz-üzədir. Bu barədə nə deyə bilərsiniz?
- Mən deyərdim ki, dövrün bəlasıdır. İldən-ilə çoxalır və cavanlaşır. Əsasən bunu elm və texnologiyanın sürətlə inkişafı, qlobal istiləşmə, elektromaqnit dalğaları, dinamiya, keyfiyyətsiz qidalanma ilə əlaqələndirmək olar.
- Miqrendən əziyyət çəkənlər var…
- Miqrenə gənc qadınlarda çox rast gəlinir. Orqanizmdə yaranan endokrin pozğunluqlar miqrenin peyda olmasına səbəb olur. Osteopatik seanslarla bu xəstəliyi korreksiya etmək mümkündür.
- Enurezdən əziyyət çəkənlər daha çox hansı yaş kateqoriyasındandır?
- Enurez (gecə sidik qaçırmaları) əsasən erkən yaşlarda meydana gəlir. Müalicəsi düzgün aparılmazsa, hətta yuxarı yaşlarda və böyüklərdə də rast gəlinir.
Nəzrin Vahid
