Masallıda İncira Ağayeva adlı qadın 14 ildir ki, işə velosipedlə gedib-gəlir. Bu haqda məlumatı Cenublu.az bu gün, 30 aprel tarixində verir.
Masallının Musaküçə kəndində yaşayan İncira Ağayeva 14 ilə yaxındır ki, Rayon Kommunal Təsərrüfatında çalışır. O, əvvəl həmişə işə piyada gedib-gəlib, amma səhhətində yaranan problemlər onda velosiped sürməyə həvəs yaradıb:
“2 ildir sürürəm. Ayağım ağrıdığına görə piyada gedib-gələndə qaranlığa düşürdüm. Amma belə evə 1 saat tez gəlirəm”.
Məlum olub ki, İ. Ağayeva Masallı Rayon Kommunal Təsərrüfatı İdarəsində çalışır. O, bu nəqliyyat vasitəsi ilə həmin rayonda işə gedən yeganə qadındır. Velosiped sürməyi isə cəmi 1-2 günə öyrənib. İncira xanım deyir ki, onun bu addımını istər iş yoldaşları, istərsə də ailə üzvləri müsbət qarşılayıblar.
Velosiped köhnə olsa da, bu Ağayevlər ailəsinin sahib olduğu yeganə nəqliyyat vasitəsidir. Velosiped işə getmək üçün nəqliyyat olmaqla yanaşı, həm də ailənin bazarlıq işlərində kömək edir.
İ.Ağayeva bir az köhnə olan bu velosipedini indi yeniləmək istəyir. Buna görə də işdən əlavə hazırladığı əl işlərini satışa çıxarmaq fikrindədir.
