Bu gün Lənkəran və Cəlilabad şəhərlərində narkomaniya mövzusunda maarifləndirici görüşlər təşkil olunub. Bu haqda məlumatı Cenublu.az bu gün, 20 oktyabr tarixində verir.
“Narkomaniyaya qarşı mübarizə sağlam həyatın təminatıdır” adlı tədbir Lənkəran şəhər 10 nömrəli tam orta məktəbində keçirilib. Burada məqsəd şagirdləri zərərli vərdişlərin yaratdığı problem və fəsadlar mövzusunda maarifləndirmək və onlar arasında sağlam həyat tərzini təbliğ etmək olub.
Cəlilabad rayon Kazımabad kənd tam orta məktəbinin akt zalında “Narkomaniyaya yox deyək!” mövzusunda görüş baş tutub. Tədbirdə çıxış edənlər yeniyetmələrə narkomaniya barədə ətraflı məlumat veriblər və cəmiyyətimizin mənəviyyatına, genofonduna ağır və sağalmaz zərbə vuran bu bəlaya – narkomaniyaya “yox” deyərək çağırış ediblər.
Növbəti tədbir isə ADPU Cəlilabad filialının akt zalında təşkil olunub. “Narkomaniyaya yox deyək!” və “Erkən nikahların fəsadları” mövzusunda olan toplantıda rayon Polis şöbəsinin rəisi və əməkdaşları, rayon üzrə gənclər və idman sektorunun əməkdaşı, universitetin direktoru, müəllimləri və tələbələri olmaqla 130 nəfər iştirak edib. Burada tələbələr narkomaniya barədə ətraflı məlumatlandırılıblar və onlara erkən nikahların qarşısının alınması üçün maarifləndirici görüşlərin keçirilməsinin vacibliyini bildiriblər.
