Lənkəran və Lerik rayonlarında aqroturizm təsərrüflarında məlumat turu keçirilib. Bu haqda məlumatı Cenublu.az bu gün, 25 oktyabr tarixində Azərtac-a istinadən verir.
Belə ki, əvvəlcə Lənkəranın İstisu qəsəbəsində yerləşən “Sitrus vadisi” təsərrüfatı ziyarət olunub. Turizm şirkətlərinin nümayəndələrinə sitrus bağının salınması, ağaclara qulluq, meyvə yığımı zamanı diqqət edilməli qaydalar, sitrus meyvələrindən hazırlanan məhsullar barədə məlumat verilib.
Sonra qonaqlar Lerikdə yerləşən “Lerik Longevity Honey” təsərrüfatına səfər ediblər. Burada onlar balın toplanması və süzülməsi prosesində iştirak ediblər. Nümayəndələrə müxtəlif arı məhsullarının hazırlanması, arı məhsullarının faydaları barədə məlumat verilib.
“Şəhərdən Kəndə” layihəsi çərçivəsində keçirilən tədbirdə Azərbaycanda fəaliyyət göstərən 30 turizm şirkətindən 33 nümayəndə iştirak edib. Burada məqsəd ölkəmizdə aqroturizmin inkişaf etdirilməsi, regionlarda yaşayan əhalinin məşğulluğunun artırılması, eləcə də şəhər sakinləri və xarici turistlər üçün fərqli turizm imkanlarının yaradılmasıdır.
Qeyd edək ki, infoturlar Kənd Təsərrüfatı Nazirliyi tərəfindən “Paşa Holding”in dəstəyi həyata keçirilib.
