Rusiyada məşhurlaşan azərbaycanlı müğənni Coni (Cahid Hüseynli) Rusiyanın "Men Today" adlı məşhur kişi jurnalının yeni sayına müsahibə verib.
Cenublu.az xəbər verir ki, o, musiqiyə olan marağının genlərindən gəldiyini açıqlayıb:
"Ümumiyyətlə, qohumlarımın çoxu musiqiçi olub. Onlar, əsasən, Azərbaycan və ya türk xalq mahnılarını ifa ediblər. Yeri gəlmişkən, əmim Xanhüseyn Hüseynov 80-ci illərdə məşhur ifaçı olub. Onun inanılmaz tembrli, cingiltili səsi bütün Azərbaycanda eşidilirdi. Ona görə də dəqiq deyə bilərəm ki, musiqiçi ailəsində böyümüşəm. Ancaq mən və əmim musiqidə böyük uğurlar qazanmışıq və hər ikimiz fevralın 29-da anadan olmuşuq”.
İfaçının sözlərinə görə, onun peşəkar müəllimləri olmayıb, vokal texnikası isə Qərb üslubuna daha yaxındır:
"Çalışsam, təbii ki, muğam ifa edə bilərəm. Amma bu, mənim üçün bir az qeyri-təbii çıxır. Baxmayaraq ki, qanda meyillik var, sadəcə, onun üzərində işləmək lazımdır. Mənim böyük məqsədim melodiyadakı Avropa və Qərb hərəkətlərini dərk etmək idi. Bunu indi mahnılarımda hiss etmək olar".
