Cəlilabad Rayon İcra Hakimiyyəti başçısının inzibati ərazi dairəsi üzrə nümayəndəliklərində mövcud olan problemlər və bələdiyyələrin iş fəaliyyəti ilə əlaqədar müşavirə keçirilib. Bu haqda məlumatı Cenublu.az bu gün, 22 noyabr tarixində verir.
Belə ki, müşavirədə rayonda görülmüş işlərlə yanaşı, mövcud nöqsan və çatışmazlıqlar barəsində danışılıb. Burada vətəndaş müraciətinə həssaslıqla yanaşılması, korrupsiyaya qarşı mübarizə tədbirlərinin güncləndirilməsi, qanunsuz tikililərin qarşısının alınması, sosial işçilərin işə davamiyyətinə ciddi nəzarət edilməsi, şəhid ailələri və müharibə əlillərinin müraciətlərinə diqqətlə yanaşılması, nümayəndəliklərdə ağacəkmə aksiyalarının keçirilməsi, bələdiyyə mülkiyyətində olan torpaqlarda dövlət rüsumlarına, icarə haqlarına və hərrac qiymətlərinə yenidən baxılması və s. mövzular üzrə müzakirələr aparılıb, müşavirə iştirakçılarına tövsiyə və tapşırıqlar verilib. Daha sonra iştirakçıları maraqlandıran suallar cavablandırılıb və ətraflı izah verilib.
Tədbirdə, həmçinin icra başçısının müavinləri, aparatın məsul işçiləri, aidiyyəti idarə və təşkilatların rəhbərləri, rayon inzibati ərazi dairəsi üzrə nümayəndələr və bələdiyyə sədrləri iştirak ediblər.
Sonda 22 iyun 2023-cü il tarixli “Dövlət qulluqçularının təltif edilməsi haqqında” Azərbaycan Respublikası Prezidentinin Sərəncamı ilə Dövlət Qulluğunda səmərəli fəaliyyətinə görə rayon İcra Hakimiyyəti başçısının Sərhədabad kənd inzibati ərazi dairəsi üzrə nümayəndəsi Əlizamin Əzizova “Tərəqqi” medalı təqdim olunub.
