Bu gün, 17 avqust tarixində Azərbaycan və Dağıstan Respublikalarının Xalq artisti İlhamə Quliyevanın doğum günüdür. Cenublu.az izləyiciləri üçün mərhum sənətkar haqda 10 maraqlı fakt təqdim edir:
- İlhamə Quliyeva 1943-cü ildə Lənkəran şəhərində anadan olub. Onun atası Məzahir Quliyev o zamanlar Lənkəranın prokuroru olub;
- İlhamə xanım 5 yaşında olarkən anası, mərhum Xalq artisti Tükəzban İsmayılova SSRİ Xalq artisti tarzən Həbib Bayramovla ailə həyatı qurur. İlhamə xanımın təlim-tərbiyəsi ilə də elə ögey atası məşğul olur;
- Ali təhsilini Azərbaycan Dövlət Universitetinin (indiki Bakı Dövlət Universiteti) Filologiya fakültəsində alıb;
- 1965-ci ildən səhnədə fəaliyyət göstərən sənətkar 1982-ci ildə Əməkdar artist, 1998-ci ildə Azərbaycan Respublikasının Xalq artisti, 2008-ci ildə isə Dağıstan Respublikasının Xalq artisti adına layiq görülüb;
- 1980-ci ildə Faiq Mirmöhsünov adlı şəxslə ailə qurur. Bir müddət Mirmöhsünova soyadı daşıyan İlhamə xanım həyat yoldaşı ilə boşanır, onun soyadından imtina edərək yenidən Quliyeva soyadına qayıdır. O, ikinci dəfə ailə qurmur;
- İlhamə Quliyevanın bioloji övladı olmayıb. O, xalasının nəvəsi, Orxan adlı oğlanı oğulluğa götürür, ona öz övladı kimi baxır, toyunu edir. Lakin müğənninin ölümündən sonra İlhamə xanımın qohumları ilə Orxan arasında miras davası baş qaldırır və məlum olur ki, İlhamə Quliyeva oğulluğunu tək varis kimi elan etməyib. Hətta deyilənə görə, İlhamə xanımın son dəfə əsəbiləşməsinə və xəstəxanaya düşməsinə səbəb oğlu Orxandan gələn gecə zəngi olub;
- Sağlığında bir çox həmkarı ilə küsülü olub. Flora Kərimova, Nazpəri Dostəliyeva, Elza Seyidcahanla müxtəlif qalmaqallar yaşayıb. Nazpəri Dostəliyevaya məhkəmədə qalib gəlib və ondan 25 min manat pul alıb;
- Fikrət Əmirov, Otay Kazımov, Ramiz Mirişli, Emin Sabitoğlu, Faiq Sücəddinov, Novruz Aslan kimi bəstəkarlarla çalışan müğənninin “Mən səni araram”, “Göygöl”, “De görüm neyləmişəm”, “Toy mahnısı”, “Gülərəm gülsən”, "Çiçək yağışı", "Neylərsən", "Kaman", "Azərbaycan", “İncitmə qəlbimi”, “Anam mehribanım Azərbaycanım”, “Gülür ellər” və digər mahnıları illər keçsə də, unudulmur və təkrar ifa edilir;
- 2002-ci ildə “Şöhrət”, 2013-cü ildə isə “Şərəf” ordenlərinə layiq görülüb;
- İlhamə Quliyeva 25 fevral 2016-cı ildə tromboemboliyadan vəfat edib. İkinci Fəxri xiyabanda anası Tükəzban İsmayılova və ögey atası Həbib Bayramovun yanında dəfn edilib.
