Bu gün, 29 dekabr tarixində əslən Astaradan olan Xalq artisti, “Qızıl şlyager” Faiq Ağayevin doğum günüdür.
Faiq Ağayev 29 dekabr 1971-ci ildə Bakıda anadan olub. 1993-cü ildə Azərbaycan Dövlət Mədəniyyət və İncəsənət Universitetinin Musiqili teatr aktyoru fakültəsini fərqlənmə diplomu ilə bitirib. 1988-ci ildə “Bakı Payızı-88” respublika müsabiqəsinin qalibi olub və beləliklə peşəkar səhnəyə gəlib.
O, həmçinin “Xarkov-95” Beynəlxalq Retro mahnılar və “Qızıl Şlyager” – Mogilyov-96 Beynəlxalq müsabiqələrinin də qalibi olub.
1996-cı ildən Azərbaycan Dövlət Teleradio Verilişləri Şirkətinin solistidir. Həmçinin 2012-2013-cü illərdə Azərbaycan Dövlət Muğam Teatrının solisti kimi çalışıb.
2000-ci il oktyabrın 28-də Prezident Heydər Əliyevin fərmanı ilə Faiq Ağayevə “Azərbaycan Respublikasının Əməkdar artisti” fəxri adı verilib.
O, 2007-ci il 7-12 yanvar tarixlərində Heydər Əliyev sarayında 5 günlük solo konsert keçirməklə Faiq Ağayev Azərbaycan musiqi tarixində rekord müddət müəyyən etmiş olub.
2008-ci ilin 17 sentyabr tarixində Faiq Ağayevə Prezident İlham Əliyevin Sərəncamı ilə “Azərbaycan Respublikasının Xalq artisti” fəxri adı verilib.
Xalq artistinin atası Balağa Ağayev əslən Astaradan idi. O, 2011-ci ildə dünyasını dəyişib və doğma yurdu Astarada dəfn olunub.
