Ulu öndər Heydər Əliyev 10 may 1923-cü ildə Naxçıvan şəhərində anadan olub.
Heydər Əliyev ilk öncə Naxçıvan Pedaqoji Texnikumunda, daha sonra Azərbaycan Dövlət Neft və Sənaye Universitetində, Bakı Dövlət Universitetində, Sankt-Peterburqdakı Rəhbər Kadrların Hazırlığı Məktəbində təhsil alıb.
Heydər Əliyev 1944-cü ildə dövlət təhlükəsizliyi orqanlarına işə qəbul olunub. O, 1967-ci ildə Azərbaycan SSR Nazirlər Soveti yanında Dövlət Təhlükəsizliyi Komitəsinin sədri təyin olunub və general-mayor rütbəsini alıb.
Əliyev 1982-ci ildə SSRİ Nazirlər Soveti sədrinin birinci müavini təyin edilib. Lakin 1987-ci ilin oktyabr ayında SSRİ hakimiyyətinə qarşı etiraz olaraq, tutduğu vəzifələrdən istefa verib.
Ümummilli lider 1993 və 1998-ci illərdə Azərbaycan Respublikasının Prezidenti seçilib. 2003-cü ildə olan prezident seçkilərində iştirak etməsinə baxmayaraq, səhhəti ilə bağlı yaranan problemlərə görə namizədliyini geri götürməyə məcbur olub.
Heydər Əliyev 12 dekabr 2003-cü ildə ABŞ-nin Klivlend şəhərindəki xəstəxanada vəfat edib. O, 15 dekabrda Bakıda Fəxri xiyabanda dəfn olunub.
